ភ្នំពេញ៖ ប្រធានក្រុមឧត្តមប្រឹក្សាផ្ទាល់ព្រះមហាក្សត្រ សម្ដេចតេជោ ហ៊ុន សែន បានបង្ហាញពីការគាំទ្រទៅលើបេក្ខភាពជាប្រធានសមាគមសិល្បៈកម្ពុជារបស់អ្នកឧកញ៉ា ឡេង ណាវ៉ាត្រា។

ការបង្ហាញនូវការគាំទ្រនេះគឺបន្ទាប់ពីសម្ដេចបានលើកឡើងថា អ្នកឧកញ៉ា ឡេង ណាវ៉ាត្រា អាចជួយទ្រទ្រង់នូវការចំណាយនិងការលំបាករបស់សមាគមន៍បាន។

ក្នុងសារបង្ហោះនៅលើបណ្ដាញសង្គមនាល្ងាចថ្ងៃអង្គារ ទី២០ ខែកុម្ភៈ ឆ្នាំ២០២៤ សម្ដេចតេជោបានលើកឡើងថា៖ «បន្ទាប់ពីបានឃើញអ្នកឧកញ៉ា ឡេងណាវ៉ាត្រា បង្ហាញពីបំណងចង់ឈរឈ្មោះជាប្រធានសមាគមសិល្បៈរួចមកខ្ញុំមានអារម្មណ៍កក់ក្តៅសម្រាប់អនាគតសមាគមមួយនេះ។ កន្លងមកក៏ដូចជាបច្ចុប្បន្នខ្ញុំក៏បានរួមចំណែកជួយដល់សិល្បករសិល្បការីនីដែលជួបការលំបាកតាមរយៈសមាគមផងនិងតាមបុគ្គលផងខ្ញុំគិតថាបញ្ហាថវិកាទ្រទ្រង់សមាគមដើម្បីជួយដោះស្រាយការលំបាករបស់សមាគមនៅតែជាបញ្ហាប្រឈមធំ»។

ទោះជាយ៉ាងណាសម្ដេចតេជោ មិនជ្រៀតជ្រែតលើការបោះឆ្នោតរើសប្រធានសមាគមទេតែដោយសារថាដើម្បីសិល្បៈមានការសាមគ្គីភាពនិងរីកចម្រើនទៅមុខទើបសម្ដេចផ្តល់ការគាំទ្របែបនេះ៕